زانكۆی جیهان-سه‌نته‌ری رۆشنبیری جیهان زانكۆی جیهان-سه‌نته‌ری رۆشنبیری جیهان
دیاكۆ دادگه‌ر: هونه‌رى شێوه‌كارى ته‌نیا بۆ ئه‌وه نیه كه تۆ جوانیه‌كان نیشانى خه‌ڵك بده‌یت
بەرواری (6/12/2017)، لە (گەلەریی هونەری جیهان)، یەكەم پێشانگای تایبەتی شێوەكاری ڕۆژهەڵاتی كوردستان (دیاكۆ دادگەر)، بە ناونیشانی (زامەكانم جێ دەهێڵم) كرایەوە، كە پێشانگاكە تا بەرواری (13/12/2017) بەردەوام دەبێت، تێیدا (40) تابلۆ، بە ئەندازەی جیاواز پیشان دراوە.
لەمبارەیەوە شێوەكار (دیاكۆ دادگەر) ڕايگەیاند: (زامەكانم جێ دەهێڵم) ناونیشانی یەكەم پێشانگای تایبەتی منە، سایزی تابلۆكانی جیاوازە، چونكە لە چەند كات و بارودۆخێكی جیاواز كاری بۆ كراوە، كە خۆی لە (40) تابلۆ گرتووە، دوای ئەوەی دەستم دایە كاری شێوەكاری، كە ماوەی ساڵ و نیوێكە خەریك بووم، ناوە ناوە تابلۆیەكم دەكێشا، تا وای لێهات بەشداری پێشانگای هاوبەشی پێبكەم و دواتر پێشانگای تایبەتی پێ بكەمەوە.
سەبارەت بە ناوەڕۆكی كارەكانیشی گوتی: زۆرترین ئەو كارانەی لە پێشانگاكەم دەیبینن، لەسەر خەم و خەفەت و دەردەكانە، زۆرترینیان بابەتی زیندووی ژیانی تاكی كوردە لە كۆمەڵگا، كە من لێرەدا زۆرتر سەرەنجم خستۆتە ڕۆژهەڵات، هەر بۆیە بابەتی تابلۆكانم بەشێكی سیاسین، بە ئەركی خۆشمی دەزانم وا بیر دەكەمەوە، كە هونەری شێوەكاری تەنیا بۆ ئەوە نیە كە تۆ جوانیەكان نیشانی خەڵك بدەیت، بێگومان هونەر كەرستەیەكی بەهێزە بۆ ئەوەی كە دەرد و خەمەكانیش بگوازێتەوە، من لەوەم كەڵك وەرگرتووە و بە ئەركی خۆشمی دەزانم، من سوودم لەو خامانە وەرگرتووە، ئەو دەردەی كە هاو تەمەنەكانم هەیەتیان لە ڕۆژهەڵاتی كوردستان، یا ئەو بیرەوەریە ناخۆشانەی كە هەیانە، هەروەها ئەو هەلس و كەوتە خراپەی لەگەڵیان دەكرێ، من لێرە گواستیتمەوە سەر تابلۆكانم، بێگومان ئەمەش بۆتە كارێكی سیاسی و كۆمەڵایەتی.
پتر گوتیشی: یەك لە كارەكانی پێشانگاكەم تابلۆی لە سێدارەدانە، كە یەكێكە لەو زووڵمە ناخۆشانەی گواستیتمەوە سەر تابلۆی شێوەكاری، كە لە ڕۆژهەڵاتی كوردستان، بە هۆكاری سیاسی و ئەمنی، ڕۆشنبیران و چاڵاكەوانان لەسەر مافە ڕەواكان و هەڵوێستەكانیان لە سێدارە دەدرێن، ئیتر ئەوەش وەكو ژانێكە لە ناخی مندا، بۆیە بۆتە هەوێنی تابلۆیەكم.
ئاماژەی بەوەش دا و گوتی: لەو پێشانگایەم كە نۆبەرەی كارەكانمی تێدا نیشان دراوە بە ستایلی ئەبستراك كارم لەسەر تابلۆكان كردووە، لایەنێكی لەسەر سروشت كارم كردووە، لایەنێكی تریش بابەتی كۆمەڵایەتیە، بە تایبەتی لەسەر بابەتی ژن لە كۆمەڵگاكەمان، دەرد و ناخۆشیەكانیان، چ لە لایەن یایدۆلۆژیەوە كە زوڵمێك دەكرێت لە ئافرەت، چ لە لایەن خۆمانەوە كۆمەڵگای پیاوان چ غەدرێك دەكرێ و مافە ڕەواكانیان بەو جۆرەی كە هەیە پێنادرێ.
لە لایەكیتریشەوە باسی لە یەكێك لە تابلۆكانی كرد كە گوزارشت لەو وڵاتانە دەكات كە نەوتیان هەیە. لەو باسەدا دەڵێت: دیارە نەوت بابەتێكی گرینگە لە تەواوی دونیا دا، بە تایبەت لە لای وڵاتە زڵهێزەكان، ئەو وڵاتانەی كە سەربەخۆ نین، زۆر جار غەدریان لێ دەكرێ و مەمەڵە بە نەوتەكانیان دەكرێ بەبێ ڕەزامەندییان، ئەمە بۆتە هۆی ئەوەی من بیر لەوە بكەمەوە، ئەو زەویە جوانەی هەمانە بەو هەموو ماتریالە گرانەی كە هەیە، دەستی بەسەر دا دەگیرێ لە لایەن نەیارێكمانەوە، هەر ئەوەش بۆتە هۆی ئەوەی تابلۆی لەسەر بكێشم.
لە كۆتایدا دەربارەی ناوەڕۆكی كارەكانی گوتی: بە گشتی ئەو شتەی كە لە ناخی كورددایە لە هەر چوار پارچە، ئەوە لە هەوێنی كاری مندا هەیە، بەڵام بە گوێرەی پێویست ئەو شتانەی كە دێنە مێشكی منەوە، ئەوانەی كە بینیومە یا لە سەریم خوێندۆتەوە، لە كارەكانمدا ڕەنگیان داوەتەوە.
لەبارەی ئەوەی (هیچ جیاوازی هەیە لە پارچەكانی ڕۆژهەڵات و باشوور لە ئازادیی هونەریدا؟) گوتی: ئێمە لە كوردستانی باشوور لەوپەڕی ئازادیدا دەژین، من لێرە خۆم دیوەتەوە وەكو هونەر كارێك، لە زێدی خۆم نەمتوانیوە و ناشتوانم كاری تێدا بكەم…من كەسێكی نەتەوەیم بۆیە لێرە ژیان دەكەم، هەر لەسەر ئەو بابەتانە ژیانم گواستۆتەوە، هەریەك لەو كارانە تا زەق بكرێتەوەو زیاتر خەڵك بیبینێت، حەساسیەتی حكومەتی ئێرانت لەسەر زیاتر دەبێت، گرینگ نیە ئەو كاتەی باوەڕم بە شتێكە و لەسەر ئەم ڕێگایە هەنگاوێكم ناوەتەوە، گرینگ نیە كێ پێی ناخۆشە، گرینگ ئەوەیە ئەركێكی خۆمە و لەم ڕێگایەدا هەر چەندە لە دەستم بێت، پێویستە خەڵك بیبینێت و هەست بە دەرد و ئازاری ئێمە بكەن.
سەبارەت بە پرسیاری (تابلۆكانت جیاواز لە شێوەكارانی تر، هۆی چیە هەر تابلۆیەك ناوی خۆیت لەسەر نووسیوە؟)، گوتی: بێ مەبەست نیە كاتێ من كارێك دەكەم، ڕەنگە چەند سەعاتێك بە تابلۆیەك وە دەبم، مەبەستێكم هەیە جاروایە بیرۆكەكە زۆر خۆشە جاریش وایە زۆر ناخۆش، بۆ هەر یەك لەو بیرۆكە خۆش و ناخۆشە، بۆ هەریەك لەو فكرانە، هەستم بەرەڵا دەكەمە سەر ئەو باسە، بێگومان ئەوەش ناوێكی هەیە لەو ناوەوە دەست پێدەكەم، ڕەنگەكان دادەنێم، ناو وەكو ناسنامە وایە بۆ تابلۆ، بۆ ئەوەی كەسێك كە نەتوانێ لە تابلۆیەك بگات ناوەكەی یارمەتیدەری دەبێت.
لە كۆتایدا گوتی: داواكارم ئەو شتەی كە هونەرمەند دەیكات، بە ژیانی خۆی بە پارەی خۆی، لایەنی كەم ئەگەر ئاورێكی لێنەدەنەوە، وەك ڕێز گرتنێك بۆ ئەو كاتەی كە هونەرمەندەكە بۆی دایناوە، كە شتێك دەخوڵقێنێ بۆ ئەو كۆمەڵگایە، كە پێشكەشی دەكات زیاتر كاتی بۆ دابنێن.
ئەوەی ماوەتەوە بڵێین: شێوەكار (دیاكۆ فەیزی) ناسراوە بە (دیاكۆ دادگەر)، لە ساڵی (1985) لە شاری (بۆكان)ـی ڕۆژهەڵاتی كوردستان لە دایكبووە، بڕوانامەی دبلۆمی لە كۆمپیتەر هەیە، ماوەی (4) ساڵە لە باشووری كوردستان دەژی، هەر لە باشووری كوردستان دەستی بە كاری شێوەكاری كردووە، لەماوەی ڕابردوو لە (2) پێشانگای هاوبەش بەشدار بووە.
